Tuesday, March 27, 2007

الفلحوس في التعريف بأرض باكوس


الفلحوس في التعريف بأرض باكوس
كتبه الرحالة الموكوس
ماركوس بالبوص المنحوس
.....
( الجزء الأول )
.....
أيها الداخل اترك ادنى أمل وراءك
مع الإعتذار للمعلم لويجو دانتي
.....
نبذه تاريخية
من زماااان قوي - مش قوي قوي يعني - باكوس دي كانت عبارة عن أرض زراعية مملوكة لواحد خواجة اسمه باكوس و جدتي قالت لي انه كان جريجي و كالعادة الراجل مات و لا سافر ما حدش عارف و بعدين الناس اتلمو عليها و كل و احد خد حتة من الأرض و كان فيه واحد اسمه الحاج أبو شبانة شكله كده كان أول واحد اشتري من الأرض دي لأن معظم المحلات اللي هنا تبعه و كمان فيه مسجد كبير في باكوس اسمه ابو شبانة بل ان محطة الترام اسمها محطة ابو شبانة مش باكوس و بعدين و مع مرور الوقت اصبحت باكوس بالشكل العظيم اللي احنا شايفينه دلوقتي و بقت مفخرة الأمم و بالمناسبة انا دورت على معني كلمة باكوس في الكتب فلقيت ان باكوس ده كان إله الخمر عند الرومان ومش هعلق اكتر من كده

الموقع الفلكي
مش عارف هيفرق معاك الموقع الفلكي ولأ
عموما هريحك
لو كنت بره مجرة درب التبانة خد أي مشروع - يسميه الأعاجم ميكروباص - بخمسة و تلاتين صاغ قول له نزلني عند كنتاكي التبانة
تمام
لو كان معاك فلوس وقف أي تاكس - يسميه الأعاجم تاكسي بالياء - قول له بس باكوس ولو رضى يقف و ده من رابع المستحيلات هيوصلك طوالي من غير ما تتعب نفسك وتتعبني معاك أما لو بقه كنت مفلس أو نتن و مش عايز تريح نفسك ولا تريحني معاك اركب كارته - بكسرالراء وتشديد التاء - و يسميها الأعاجم حنطور - من عند نفق بلوتو أبو تلات عيون لغاية محطة القطر اركب القطر من أوله لغاية محطة المشترى انزل هناك يا معلم و ادي بقة وشك لشارع المشترى العمومي اللي على قمته كنتاكي برضه بس ده كنتاكي المشترى غير الأولاني ركز عشان ما تتوهش و اتمشى شوية فيه و كأنك رايح على نبتون لغاية ما توصل الزهرة ادي بقة و شك للشمس و ضهرك لبلوتو و انزل طوالي على كوكب الأرض سيب أول قارة تاني قارة ملاكش دعوة بيها تالت قارة برضه مش تبعنا رابع قاره ادخل فيها وهناك اسأل عن مصر بص هي باكوس بالضبط في النص بين ممممممممم ولا أقولك بلاش السكة دي سكة صعبة و كلها مخاطر امشي الطريق الطويل السهل احسن كنا وصلنا مصر منها بقه روح لاسكندرية و منها لحي الرمل و هناك خلي بالك عشان كده خلاص هانت قربنا نوصل طلع الباسبور و جهز الفيزا و اوعى تكون داخل بفيزا مضروبة العساكر بتوع جوازات باكوس صيع و حيقطعوك و يعني نص ساعة كده بالأوتوبيس لو كان شارع أبو قير فاضي تكون وصلت يا حلو وانت اللي جنيت على نفسك و ما حدش ضربك على ايدك ولا زقك هنا بالعافية وأهلا وسهلا بيك في الجمهورية الأشتركية الرأسمالية الليبراليه التكعيبيه الملوخية باكوس الألمظية

الموقع الجغرافي
باكوس موجودة بالضبط عند خط عرض قول قيمة كده يعني 95.25 شمال و خط طول قول 22.01 شرق يعني و يمكن اكتر حاجة بسيطة مش متأكد بالضبط
شكلك كده مش مصدقني عموما أخطف رجلك و روح حسب ما وصفت لك ولو ما وصلتش ابقى غلطان يا عم
و باكوس بقه لا تطل على بحار ولا انهار و لا جبال ولا هضاب ولا أي حاجة في الواقع
يعني لو كنت عايز تقضي فيها شهر العسل ما انصحكش روح جزر المالديف أو البهاماس احسن بس بالمناسبة في الجنوب البعيد جدا فيه فرع ترعة المحمودية و عموما هو معظم السنه ناشف و ما فيهوش ميه بس ساعات في الشتا لما الميه ما بتكونش مقطوعه بيتملا لحد نصه تقريبا و بييجي مع الميه حيوان اسطوري قذر بيعيش على اكل الفيران و الفضلات و مياهه المفضله الصرف الصحي و هو خليط من السمكة و التمساح و البرص و الصرصار و لونه اسود و ريحته نتنه و بيعيش جوه الميه و برضه براها و ما تسألنيش ازاي و بعد كل ده الناس بتاكله و يمكن أن نطلق على هذا التنين الخرافي الإسم الذي اصطلحوا عليه و هو مشتق من سبة بذيئة وهو على فكرة مناسب له جدا ألا وهو القرموط
و منطقة الترعة دي من افقر الحتت اللي ممكن تشوفها في حياتك و اللي كان أشرف على تطويرها دكتور في كلية الهندسة قسم عمارة هو ومراته و منهم لله بقه لا هم شايفين شغلهم صح و لا كانوا بيدونا درجات في الكلية
المهم
ما فيش معالم طبيعيه في باكوس تاني غير الطوفان الباكوسي الكبير اللي بيغرق باكوس كل سنة في الشتا و بتصبح عبارة عن بحيرة كبيرة موحلة تمتد في شارع السينما من عند محيلبة إلى سنجر و السبب ان المجاري بتكون مسدودة دايما و هم دلوقتي بقالهم سنة شغالين فيها و ما خلصتش لسه و بالمناسبة حكماء باكوس بيدرسوا اقامة سد عظيم نحجز بيه الميه الكتيرة دي عشان نعمل بحيره نربي فيها قراميط و ممكن نستورد من المنشية آلات توليد للكهربا اللي كل شويه تتقطع و يكون مشروع عظيم ما يقلش حاجة عن السد العالي اللي عمله بطل النكسة بتاع الضباط الأشرار في اسوان

التضاريس
ياريت تفكيرك النجس ما يروحش ناحية حاجة مش ولا بد لما أقولك إن باكوس ما فيهاش تضاريس حاكم انا عارف الشباب بتوع اليومين دول كل الكلام قلبوه و خلو ليه معاني مش قد كده حتى لو قلت له شربت ميه يقول لك ميه يعني بيرة
و بكرر و اقول ان باكوس سهل فسيح مريح منخفض منقبض من الوسط حيث تتجمع المياه فيه و قت الشتا و اللي لسه متكلمين عنها فوق

المساحة
قيمة 556235.3256 ميل مربع و45 عقدة بحرية و 8 قيراط و 27 ميلليمتر
و فرسخين شايلنهم في التلاجة عشان لو احتجناهم بعدين

المناخ
حار رطب صيفا مظبط ممطر شتاءا و كل سنة تيجي الخماسين تخلي كل حاجة صفرااااا و تملا الدنيا تراب يعفر على الهدوم و العربيات و بعدين تقوم الدنيا شاتية - شاتية من الشتا مش شادية بتاعة كمال الشناوي - تقوم تحول التراب ده لظبط

الحدود
ااااه هو ده بقى السؤال اللي مالهوش اجابة محددة أو مالهوش اجابة تقريبا و ما فيش حد ممكن يقولك باكوس دي أولها فيين بالضبط و آخرها فين و ده لأن باكوس دي جربة - بفتح الجيم و الراء و الباء و دماغك لو حبيت - و كل الناس بتستعر منها و كإنها و صمة عار يعني في ناس لما تقولها انت من باكوس دمه يغلي و وشه يجيب 32 لون و يصرخ في وشك
انت بتستهبل ده منظرواحد جاي من باكوس ده
و كأنك قولت له انت بتشم أو ماشي مشي بطال أو سارح - لا مؤاخذه - ورا رقاصة
و افتكر حاجة مضحكة حصلت زي كده تؤكد كلامي اني شفت مرة واحدة كانت معانا في الكليه - ومش هاقولك اسمها اللي انت هتموت وتعرفه - في باكوس العاصمة و كانت ماشية مع ولد باكوسي معتق اعرفه شخصيا البنت دي بقى كنت مخنوق منها عشان كانت عايشة الدور علينا و فاكرة نفسها بنت ناس فجاني الشيطان الصغير اللي جوايا و اللي زي اللي موجود عند توم و جيري و وشوش لي بفكرة جامدة موت رحت داخل عليها و هي واقفة مع صاحباتها كده من غير تفاهم زي الطيارة المحروقه و رحت مسيح لها تسييحة زي اللي بالك منه
اسمع الحوار مشى ازاي
ازيك يا فلانة
بصت لي و هي مستعجبة و ماكنش فيه كلام بيني و بينها خالص
فقالت في استغراب الغراب و استنكار الشنكار
ازيك
على فكرة انا شفتك امبارح
وشها جاب نفس ال 32 لون اللي فاتو
انا
ايوة انتي شفتك عند البيت عندنا في باكوس
طبعا اول ما قلت باكوس كان حيغمى عليها و قعدت تنكر اشد انكار انها عمرها ما راحت هناك و عمرها ما سمعت عنها اساسا حكيت انا دقني في خبث و ابتسمت ابتسامتي السمجة المعتادة من جنب بقي الشمال و رفعت حاجب و نزلت التاني على طريقة ستيفان روستي و هو بيقول لفريد شوقي باردون يا اكسلانس و كل ده و أنا ببص لها بصه من نوع - آه يا كدابه و قلت
جايز
واديتها ضهري و انا ماشي قولت لها
بس ابقي سلمي لي على فلان
و قلت اسم الولد اياه و سيبتها و مشيت وهي عمالة تسب و تلعن في سرها
نرجع لموضوعنا
زي ما قلت لك ما فيش حدود معينة لباكوس ممكن تديق جدا فتكون يا دوبك تلات او اربع شوارع و ممكن توسع قوي فتكون تلات او اربع أحياء
يعني تعالى نا خدها كده واحدة واحدة
فيه ناس عايشين في باكوس ومش ممكن يقولوا انهم بره باكوس بأي حال من الأحوال زي حالاتي كده و هم اللي ساكنين في نص باكوس بالضبط في العاصمة و دول اللي وقعوا
ولا حدش اتسمى عليهم تحت خط باكوس قهرا و هي المنطقة المحدوده بشريط الترام شمالا و شارع 20 جنوبا و شارع السوق شرقا و شارع سينما ليلى غربا الحتة دي قلب باكوس اللي ساكن فيها ما يعرفش يفلفص منها و يقول مثلا أنا ساكن في صفر أو فلمنج أو حتى جليم
باكوس بقة ممكن تتسع شمالا لغاية ما توصل لشارع ابو قير و الإمتداد ده ظالم في نظري لأن المنطقه دي نضيفة و الشباب اللي فيها فنكي منكي بس ده ما يمنعش ان في ناس بتقول ان شارع الإذاعة - اللي فيه مبنى القناه الخامسه - باكوس و شارع دياب باكوس بل و كنيسة الفرانسيسكان باكوس برضه و ما اعرفش ايه نظريتهم في كده
و كمان باكوس ممكن تتسع غربا لحد ما تلتهم حي فلمنج كله و كمان ممكن تعديه لغاية ما توصل قرب بولكلي - تنطق بوكلى - بس حاسب عندك اوعى تقول ان زعربانة و مساكن العبور و شارع وينجت و شارع لافيزون تبع باكوس دي أقاليم حليفة ليها حكم ذاتي و ما ينفعش نتعدى عليها بس ده ما يمنعش ان الضاهرية ارض باكوسية قلبا و قالبا و لغاية قرب زعربانة كده كلها من ارض باكوس الطاهرة
أما جنوبا فممكن نقول ان باكوس ممكن توصل لغاية الترعة - مرورا بأرض الفولي و شارع 20 و امتداد شارع السوق و منطقة شركة ايكا و كوبري الناموس - و وصولا للعوايد - مرورا بشرع الشركة العربية و شارع أحمد أبو سليمان - و تضم ليها المنطقة الواطية دي و اللي ما تشرفش حد و اللي هي بتطل على ترعة المحمودية من عند كوبري الناموس لغاية ميدان العوايد وده مش حيزيد باكوس شرف أكيد يعني
و شرقا بقة باكوس تمشي معاك في شارع مصطفى كامل من أول شارع السوق لغاية غبريال يعني عند الباشا كده و ممكن لغاية شريط القطر بس بعد كده بتكون حته تانية خالص بعيد عن باكوس و كمان بالمناسبة حي صفر ممكن يكون داخل في باكوس لغاية مدرسة عبدالعزيز جاويش بس ياريت ما تسرحش بخيالك بعد كده لغاية ما تدخل قصر الصفا مع باكوس لأنك كده هتكون حاجة من أتنين يا عبيط يا أهبل
يعني من الآخر باكوس مالهاش شكل معين حاجة كده زي الأميبا كل شوية تكبر و تصغر و عمال شكلها يتغير كل شوية يعني فيه واحد تسأله ساكن فين يقولك صفر بس العنوان بتاعه بيكتب فيه باكوس واحد تاني ساكن عند مدرسة الناصرية تقوله انت منيين يقولك جليم وهكذا
ومن أجمل التشابيه اللي قريتها في حياتي عن الموضوع ده تشبيه لواحد من أبطال قصة - كل شيء هادئ في الميدان الغربي - بتاعة الكاتب الألماني جونتر جراس لما قال عنه
يجلس في ركن الغرفة كالجرادة و حين يقف ينتفخ كالقربة

البسيج الحضري
زي ما كل الدنيا ماشية في الشمال احسن الاماكن و تزداد سوءا كلما تهبط لأسفل زيها زي أي غابة بتحترم نفسها من غابات افريقيا الكثيفة فوق حشائش استبس قصيرة و بعدين نخش على السافانا و بعدين بعيد عنك و عن السامعين تدخل على الأحراش

الموارد الطبيعية
لا يوجد - الميه فيها كلور و الهوا فيه ثاني اكسيد الكربون

استغلال الأرض
95% مباني
خرابات % 5 - جمع خرابة - و هيبنوها كمان شويه و تكون مباني و نخش موسوعة جينيس للأرقام القياسية بنسة 100 % مباني
.
الظروف البيئية
ظروفها صعبة

الحاله الطبيعية العامة
تعبانة و بتعافر و حالتها تصعب ع الكافر
و إلى اللقاء مع الجزء الثاني

Sunday, March 18, 2007

ماذا تعرف عن باكوس ؟


باكوس
ارض الميعاد
الصين الشعبية
كلها مسميات تؤدي إلى نفس المعنى بل للدقة إلى نفس المكان
و باكوس دي مش مجرد مساحة من الأرض محصورة من كذا إلى كذا أبدا
الموضوع أكبر من كدة
باكوس تختلف اختلاف كلي و جزئي عن أي أرض أخرى لأن فيها من المواقف و الغرائب و اللطائف و الطرائف و العبر و الحكم و الملل و النحل و الفظائع و الوقائع والمحاشي والخراشي والنفائس و الكنائس و الصفاقص و المراقص ما لن تجده في كتاب كليلة و دمنة و لا كتاب دكتور سبوك في فنون تربية الأبناء ولا حتى كتاب العلوم بتاع تانية اعدادي
اسمعك - تقاطعني - صارخا في سخط
يا عم ارحمنا بقة عمال تجعلص في أم الحوار وهو مش مستاهل فيها إيه يعني أم باكوس دي اللي انت فرحان بيها
دي منطقة معفنة مافيهاش حاجه عدلة و المجاري دايما ضاربة فيها مش عارف لييه
فاجيب عليك بأدب
و الله بقة محدش ضربك على ايد امك عشان تدخل هنا عاجبك الكلام يا ابن عمي وعايز تكمله أهلا و سهلا مش عاجبك في ستين ألف داهية
الكنيف مش ناقص ( ك - خ )* بلاش وجع بطن
و من هنا تعرف ان أهل باكوس لا يهزمون في حوار أبدا
و تكملة للكلام اللي انت قطعته احب اقول ان مشكلة باكوس هي حاجة واحدة بس ان ما فيهاش اي حاجة مهمة حصلت قبل كده أو حتى هتحصل
موجودة أو منسية
عارفينها ولا مش عارفينها
و عشان كده تميزت بين بقيت العالم
يعني مثلا لا هي قديمة قوي و فيها اثار ولا ليها اي ذكر في اي كتاب من الكتب القديمة و لا خرج منها كاتب كبير و لا عالم عظيم ولا حتى لعيب كورة ولا زارها قبل كده ارسطو ولا اعتقل فيها محمد فريد ولا اندفن فيها زكي جمعة ولا مرة كان ليها اي نضال ضد فرس او روم او هكسوس او انجليز او يهود او حتى امن مركزي زي ما تقول كده صفحتها في كتاب التاريخ - لو ان ليها صفحة اساسا - بيضاااااااااااااا ما فيهاش اي حاجة وسيرتها اللي على لسان الناس كلها زي زفت وعك في عك
يعني مثلا تلاقي واحدة ارستقراطية بتقول
لو فيندردي بروشا - يوم الجمعة اللي فات بالفرنساوي يا جاهل - كنت في حتة كدة مش قادرة اتخيل انها موجودة على الأرض اسمها شانكوس مانكوس حانكوس
احم ... باكوس يا مدام

اوه مون ديو - يا إلهي بالفرنساوي يا جاهل برضه - الناس هناك بشعين خالص وفقرا كدة وجربانين اوف شكلهم وحش قوي
وتلاقي واحد صايع ضايع بيقول
ديك النهار - يقصد هذا النهار - كنت في المدعوقة - باكوس - باقضي - كناية بليغة جدا عن شراء الحشيش - الوله ابن الـ( ك - خ ) قرم - أي عض - من التربة
- وحدة قياس الحشيش المتدرجة من قرش و زغروف و سمسون وتوناية - وطلع من حنكة - بقة - و اداني
وتلاقي راجل طيب بيقول
يا اخي دي حته مش ممكن كل لما ادخل اي مسجد اصلي فيه الجزمة تتسرق حاجة عجيبة
ولما حد يذكرها بالخير مثلا يقول
ده انا رحت لواحد سنكري - يقصد سمكري - هناك اسمه سعيد مرزبة رد لي الخبطة اللي في الرف رف الشمال بقت ولا
كإنها موجودة
وفيه بنت صغيرة ممكن تقول لباباها
يا بابا عايزة فانوس من الراجل اللي في باكوس
وفيه ناس تانيه ليها مآرب أخرى في باكوس زي واحد يقول مثلا
أنا أعرف اتنين قهوجيه في باكوس باروكه وزعبلة عمري ما اتزنقت في عركه الا و تليفون صغير لحد فيهم الاقي عربيتين نص نقل محملين بشر يخدموك بعنيهم عيال ماجابتهومش ولادة
وفيه واحد تاني يقـ......ء
انت تاني تقول مقاطعا
ابدا مش للدرجة دي انا بروح باكوس كل اسبوع عشان اشتـ ..............ء
فأرد أنا مرة أخرى و لكن بكثير من الأدب هذه المرة
كلمة تانية و حفرتك الجزمة على دماغ اهلك يا سي ( ك - خ )ء
نرفزتني يا بعيد
كنت با قول ان معنى كده ان باكوس دي انعقدت عليها الخناصر زي ما بيقول العرب القدامى دلالة على التوافق على إنها مدينة عجيبة
. never-never land .
زي ما بيقول الأمريكان و ده طبعا ما يمنعش إن فيها ناس أفاضل كتير بس هي خدت سمعة منيلة بستين نيلة من الصيع اللي فيها و العراك اللي الناس بيشوفوه
و الشهاده لله الإجرام في باكوس مخدرات و عراك بس بعييد كل البعد عن القاذورات اللي مالية دماغك عن الأسكندريه و حريم الأسكندرية
أنا عشت في باكوس 23 سنة ما عرفتش فيها ولو واحدة بس الناس بيوصفوها بشيء سيء صدقني صحيح
بس لو كنت من باكوس ما تنكرش ان فيه لمسة فخر كده بتجيلك وانت واقف بين ناس من برة باكوس
يعني لو كنت بتتعارك مثلا وفي نص العركة حسيت انك حتتغلب كفاية انك تصرخ بصوت جهوري و تقول
أنا من باكوس يا صيع
ده حيصيب خصومك بحالة من البلبلة اللحظية من جراء وقوع كلمة باكوس في ودانهم و اكيد كل واحد فيهم لييه ذكرى مش ظريفة هناك ساعتها ممكن تلاقي حته فاضية اتفتحت بينهم تهرب منها
ولينا ان شاء المولى جلسة كاملة انا ناويها عن فنون العراك في باكوس و انا حاسس انه حيكون مقال دسم مفيد مايقلش حاجة عن كتاب حرب العصابات بتاع الاستاذ جيفارا الشيوعي
ولو قاعد مع جماعة فرافيرو تقولهم
اني من باكوس - استبدل انا بـ اني لتدل على انك بيئة
حتتقل في نظرهم و كل واحد حيعمل لك الف حساب قبل ما يفكر يكلمك لان ده يدل على انك مش سهل و سليط
حتى لو عايز تتنطط على شوية بنات هايفين قولهم بس
انا من باكوس وانت عاوج لسانك و تلذذ بنظرة الخوف و الاعجاب في عينيهم كأنك انسان بدائي لسه نازل من على الشجرة حالا و عايش على الجمع و الإلتقاط
طبعا ده مع البنات الهايفين بس لانك ممكن تختار واحدة غلط و تقولها
انا من باكوس
ترد عليك و تقول
وأنا من الحضرة
بس خد بالك يا ابن باكوس إياك إياك و حذاري و على الله لو كنت بتستعر من باكوس تقف مع شوية عيال تقولهم انا من زيزينيا و انت ساكن ورا شركة إيكا وبينهم ما بين الصين و زائير أوعى تعمل كده صدقني ده مش هيزودك حاجة بل لو انكشف الكدب ده هيكون شكلك وحش قدامهم و وحش قدام نفسك وده الأهم قدام نفسك
افتخر و انتفخ انت من أهل باكوس
مش عارف لغاية دلوقتي الكلام غير منظم في المرة اللي جايه بإذن الله هيكون فيه دراسه موضوعية مهلبية عن باكوس هاشرح فيها كل شيء عن اللغة و العادات و التقاليد والعمله الرسمية و نظام الحكم وما إلى ذلك
والسلام




------------------------------------------------------
ء( ك - خ )* = كلام خارج


Friday, March 16, 2007

تعيش باكوس حرة مستقلة


مش عارف الموضوع ده إبتدا كده ازاي
هاقولك ايه اللي حصل
كنت قاعد بدور على النت عن مكتبات الكتب المستعملة في مدينة الرياض ( أنا باشتغل هناك حاليا و اقيم فيها من شهرين تقريبا ) لقيت جماعة كاتبين حاجات عن إسكندرية و كان فيهم واحد كاتب مقال بعنوان - أيدلوجيه - قريت الموضوع و كأن نزلت علي صاعقة
إيه ده
أخيرا فيه حد غيري و غير أصحابي أعضاء رابطة (باكوس للأبد) حاسس باللي بيحصل في إسكندرية
الصراحة ماكنتش مصدق نفسي قمت على طول ما ضيعتش وقت و قررت ان العالم لازم بقة يعرف كل شيء عن أعظم و أسوأ وأجمل و ألعن و أنضف و أوسخ حتة على وجه الأرض
باكوس
الناس بيقولو ان نيويورك هي أكتر بلد فيها أشكال و أنواع بشر في العالم يعني فيها الهندي و الانجلو ساكسن والزنجي و العربي و التركي و الصيني و اليهودي ... يعني تقريبا كل الجنسيات تلاقيها هناك
أنا بقة بقول إنك عمرك ما هتلاقي جماعة من الناس مختلفين مش بس لونهم او تعليمهم او أصلهم و لكن في كل حاجة و عايشين مع بعض في مكان واحد مستقرين و في نفس الوقت متناقضين زي ما هتلاقي في باكوس
أكبر المساجد هناك وراه على طول بخمسين متر تقريبا و على نفس مزلقان القطر أنيل حتة ممكن تشوفها لبيع الحشيش و الأسلحة المتطورة طراز "ق-غ" قرن غزال وطراز "ت-م" تلت مصدي
فسخاني الرمل الوحيد فاتح جنب حلواني شهد الملكة
الحضانة الملكية فوق قهوة البغدادي
في باكوس هتلاقي دكتور الجامعه ساكن جنب السباك و فوقه العجلاتي جار المهندس و كلهم في بيت واحد وما فيش حد زعلان من التاني
باكوس دي منطقة الملتزمين و الصيع والمدارس و المخدرات و البرس و حارة الشخشخ ومساجد الدعوة السلفية و مساجد التكفير و الهجرة و شارع عشرين أكبر معاقل الإخوان و مزلقان القطر اللي ما بيفوتش اسبوع غير لما يكون أكل واحد والكنائس المهجورة دي اللي ما أعرفش أسمها و لا بيزورها حد أساسا و أفران العيش المزدحمة كابواب جهنم و مبنى الأزاعة و التليفيزيون ومدرسة الناصرية وسوق السمك برائحته المميزة وسوق الخضار و الضاهرية و سينما ليلى (والله كانت من معالم باكوس ولكن خلاص حيهدوها و يبنو مكانها عمارة كالعادة ) و مسرح قيس وأبو كمال وقهوة الصعايدة و شارع السوق و....و.....و
وحاجات كتير تانية هاحكيلكم عنها بعدين
. وتصور يا أخي أن كل الحاجات دي مع بعض مافيش حاجة بتكب على اللي جنبها . سبحان الله . و الله شيء عجيب
لا الكويس بيخلي اللي جنبه كويس ولا النتن بينتن اللي جنبه
و الأغرب من كده أنها ملاصقة لمكان نضيف قوي هو حي جليم ولا يفصل بينهما إلا شريط الترام يعني تخيل انك ماشي في منطقة من أخطر الأماكن الموجودة على و جه المجرة مافيش حاجة فيها عدلة السواد النفسي و المعنوي يكسو كل ملليمتر منها و بعدين تعدي شريط الترام تلاقي نفسك في الجنة حاجة كده زي ما قال الخواجة مايكل كرايتون في مقدمة قصته المشهورة - كونغو
"انها ليست فقط قفزة عبر الأرض انها قفزة عبر الزمن"
طبعا هوه قال كده وهو بيوصف الانتقال من احد المناطق المتقدمة الي احراش افريقيا و اكيد هوه ما شفش باكوس لو كان شافها اكيد كان حيغير اسم قصته
انا بقه بحب باكوس دي جدا و بكرهها برضة جدا خلطة غريبة كدة مش ممكن تفهمها الا لما تفهم المثل الشعبي العبقري اللي بيقول
أدعي على إبني و اكره اللي يقول آمين
انت بتحب أمك لأنها أمك مهما كانت في الآخر أمك مابتحبهاش لأنها أحلى واحدة او أغنى واحدة مثلا
أنت كده بتحبها وخلاص لو قدرت تفهم ده يبقى أكيد هتعرف أقصد ايه
المهم انا دلوقتي فيه 213546541546 فكرة عاماله تخبط و ترقع في دماغي لكن أنا هاحاول أرتب الحاجات دي عشان تكون شيء مفهوم للناس و على فكرة أنا متعصب جدا مش لإسكندرية بس لا لباكوس بشكل خاص يعني انا على طول فيه مشاكل بيني و بين ابناء الأقاليم المجاورة سواء كانت انضف (زي جليم و زيزينيا مثلا) أو أوسخ ( زي زعربانة أو عزبة دنَة مثلا ) و عموما انا هاشرح كل شيء بعدين بشكل مفصل من حيث كل حاجة من أول منير شحاته لغاية مزلقان القطر
والحدق يفهم