Thursday, June 7, 2007

اللعنه "تاج" على رؤوس المدونين

تاج تاج تاج

أول مرة في حياتي اسمع عن حوار التاج ده
لما قريت التاج بتاع
Alexandrian far away
قريته عادي يعني و قلت أيوه يا عم ماشيه معاك لاعبة يا ابا المعلم و صل و بيعملو معاه لقاءات بكرة يطلع في التيليفزيون
اللي اداك يدينا ياسيدي
بس لما بصيت عشان اعرف ميين اللي بعت له التاج ده لقيت واحده اسمها ساسو و لقيت ساسو بعت لها التاج محمد ياسر و محمد ياسر بعت له التاج هدوء و هدوء باعت له التاج دافنشي و دافنشي باعت له التاج البتاع و البتاع باعت لها التاج النضارة السوداء و في الاخر تتوه و تحس ان اول واحد بعت تاج هو الشيطان ذاته
بس انا بحب موضوع التسلسل ده بحب قوي قصة البيضة عند الفرخة و الفرخة عايزة قمحة و القمحة عند الفلاح و هكذا
فالموضوع ده عامل زي اللعنه او زي العدوى اول ما تخلص على واحد تدور عالتاني و تحس فيها بحتة ندالة كل واحد يخلص التاج يدبس اللي جنبه من باب اشمعنا انا يعني
عموما فكرة مش بطالة
و طبعا كل الاراء اللي هنا هتكون من وجهة نظر باكوسية صميمه حتى لو ما عجبتكش
قشطه

أحب شخص لقلبك في الدنيا ؟ إنسان مستعد تضحي بحياتك - ركز فى كلمة حياتك - عشانه؟
مبدأي في الحياة ببساطة - أنا ثم الاخرين - فلو فيه حد يستاهل اني اضحي بروحي عشانه فالشخص ده هيكون انا

إنسان كرهته لدرجة الجنون و تمنيت لو تمسك سكينة وتنقض عليه وتغرزها فى قلبه تقتله وتقف تبص لجثته وتشفي غليل قلبك؟
يووووووووووو كتير قوي انا القائمة السوداء بتاعتي ما اسودتش من شوية و عندي مبدأ - اعتقد كان قايله راسبوتين - كلما ازداد اعدائي زادت قوتي .... و بيبتدو من واحد كان معايا في تانية اعدادي و كان ساقط و اكبر مني ببتاع 4 سنين و كان مستعفي عليا و قارفني في عيشتي لدرجة اني قررت ساعتها اني ابقى و كيل نيابة لما اكبر عشان اطلع بوز اهله و فيه مدرس فيزيا في ثانوي كان مستقصدني و كمان كان عندنا دكتور بيحب الحريم و بيكره الرجالة بطريقه مقرفه و ناس غيرهم كتير
و كل انسان يعاملني بتكبر و كان ابوه سلطان بروناي و انا جاي من ورا الجاموسة - مع كامل احترامي للجاموسة و اللي جايين من وراها

ما هو:اسم أجمل كتاب كتبه بشر قرأته ومحتفظ به حتى الان؟
رواية 1984 الشهيرة لجورج اورويل و بعد ما خلصتها نزلت الشارع و عينيا مدمعة و قعدت اهتف بصوت عالي يسقط الحكم الشمولي تحيا البوليتاريا المطحونة الموت للاخ الاكبرالذي يراقبك الموت الموت

اسم كتاب - كتبه بشر برضه - انت متعلق بيه وبتقرأه كل فترة؟
الاعمال الكامله لامل دنقل كتاب من القطع المتوسط يقع في تقريبا 300 صفحة من اصدار مكتبة مدبولي فيه كمية من المشاعر والاحساس المرهف و العواطف و الحب و الرقه و القسوة ما لن تجده في اي كتاب اخر و الجميل اني كل ما اقراه اكتشف فيه حته اجمل من اللي قبلها

أهم جهاز منزلى أنت متعلق بيه أو بتستخدمه كتير؟
الثلاجة

مكان تحس بالراحة عندما تدخله؟
بعيد عن الراحة الفيسيولوجيه في الحمام فيه اماكن كتير مرتبطة جوايا بحاجات حلوة ممكن ما حدش يحس بيها غيري يعني انا بحب قوي قوي قوي اطلع فوق سطح بيتنا في باكوس ساعة المغربيه و بحب انطونيادس لما الدنيا بتشتي و بحب اقعد على محطة القطر بتاعة الحضرة بالليل في شهر ديسمبر و اكون مستني الولا تيفا و ده غير تيكا و القطرة - جمع قطر - رايحة جاية قدامي و فاضية و انا ما اركبهاش

مكان تحس فيه بالحنين الى شيء لا تدرى ماهو و ذكريات جارفة الى لاشيء؟
بلكونة خالتي في محرم بيه ساعة العصاري و لازم يكون في الصيف

اجمل مدينة زرتها داخل مصر ؟
بعد باكوس انا بحب العامرية جدا

أجمل مكان طبيعي رأيته داخل مصر ؟
فيه حته بين العامرية و برج العرب اسمها الناصرية مكان بكر جدا جدا جدا واحة خضراء في نص الصحرا و فاضية جدا و كثافة السكان فيها واحد لكل كيلو متر حتى الناس هناك بدائيين جدا و على فطرتهم و لسه بيرعو غنم و بيشربو الجوزة بقوالح الدرة مش بالفحم و بيوتهم مالهاش سقف غير من الجريد

شخصية كارتونية بتحبها؟
كابتن هادوك بتاع تان تان مع انه خمورجي

نوع هاتفك المحمول؟
SAMSUNG-X160

سرعة بروسيسور جهازك؟
الاولاني 2.1 جيجا هيرتز كور تو ديو
و التاني 3.5 جيجا هيرتز بس مش ديو
أيوه عندي جهازين محطوطين قدامي عالمكتب 2 شاشه و 2 سي بي يو و بينهم نت وورك و مش مقضيين الشغل فان شاء الله هجيب واحد تالت و على فكرة فيه واحد قال لي ان فيه جهاز ابن عفاريت اسمه كي في ام ممكن اوصل بيه تلاته سي بي يو على شاشة واحده البتاع ده لو موجود يبقى معجزة عشان لما بيجي لي حد المكتب دلوقتي و بيقعد قدامي ما ببقاش شايفه من الشاشه

حجم ذاكرة -هارد- جهازك؟
الاولاني 160 جيجا
التاني 120 جيجا

المساحة التى تشغلها المواد الاسلامية على جهازك؟
اتنين جيجا قران بس و الحاجات التانيه سي ديهات

نفس المساحة السالف ذكرها فى قلبك -الإجابة لنفسك عشان الرياء يا اخواننا
...............................

أهم هدف انت واضعه لحياتك الآن؟
ابقى رئيس جمهورية جزر القمر او على الاقل رئيس وزراء ناميبيا

مواصفات فتى \ فتاة الأحلام بالنسبة لك؟
بنت ناس و متربيه و تحافظ على بيتي و اولادي و اهم حاجة تكون مطيعة و تكون طويلة عشان يكون فيه تناسق و تكون بتعرف تعمل مكرونة باشاميل كويس و تكون بتكره ايهاب توفيق و الحمد لله لقيتها

صف ما يأتى:شعورك لما بتسمع كلمة مصر ؟
مصر مرتبطة عندي بباكوس فلما بتيجي سيرة مصر بفتكر باكوس عمري ما افتكرت النيل و الهرم و القلعه و الحاجات دي و خصوصا لما تعرف اني عمري ما شفت الهرم غير في التيليفزيون
بحب مصر قوي بس جه وقت حسيت انها مابتحبنيش زي ما بحبها
حسيت انها مشغولة بحاجات كتير غيري
كل لما اجي اشكي لها همي تقول لي شششششششششششش مش فاضية

شعورك لما بتسمع كلام عن اليهود؟
طبعا بشعر بغيظ و توتر و غليان في الدم و زياده في عدد دقات القلب
الفرق بين اليهود و الصهاينه واهي جدا بل يكاد يكون غير موجود
اسرائيل هي المتكلم الرسمي عن اليهود حتى لو كانو مش عايشين فيها ولا ينتمون لها

شعورك لما بتشوف ظابط شرطة؟
اكيد فيهم حد كويس استحالة كلهم كلاب

شعورك لما بتشوف الكناس العجوز فى الطريق؟
لو ما كنش فييه حد في الشارع غيري و غيره هروح اكنس معاه

افكارك تجاه شاب ماشى فى الطريق يلبس جلابية بيضاء قصيرة وعمامة وله لحية وبجيبه السواك وبيده المصحف؟
السؤال ده غريب و مش عارف ايه اللي دخله في الموضوع
طبعا افكاري هتكون غير افكاري لما الاقي واحده لابسة محزق و ملزق و ماشيه - لا مؤاخذه - تهز في الشارع و كانها ماشيه في عزبة ابوها وقال ايه البت مش واخده بالها ان فيه الشارع عيال صيع
حاجه تفقع
اكيد بحسده على جرئته في بلد الواحد ما يعرفش يمشي فيها 10 متر غير لما يقابله كمين و يا سلام لو كان براه زي جواه

إحساس يراودك فى إشارة مرور مغلقة بسبب مسئول كبير؟
مش عارف عمري ما اتحطيت في موقف زي ده بس يعني هي جت على دي
و بعدين ما على طول الاشارات في مصر متهببه واقفة و فيه مثل اغريقي سافوسطائي بيقول
ضربو الاعور على عينه

التاج خلص
ومن منطق ابو العلاء المعري - بالياء يا قليل الادب - هذا ما جناه ابي علي و ما جنيت على احد
و عشان تعرفو اني رجوله و كفاءة
مش همرر التاج ده لحد و هكون نهاية طرف من اطرافه

Tuesday, June 5, 2007

الفلحوس في التعريف بأرض باكوس

الفلحوس في التعريف بأرض باكوس
كتبه الرحالة الموكوس
ماركوس بالبوص المنحوس
.....
( تابع الجزء الثاني )
....
صورة قديمة جدا جدا جدا لمحطة الترام بتاعة باكوس و مش حعلق كتير عليها عشان كل لما افكر ان باكوس زمان كانت كده ببقى عايز اعيط